വാഷിങ്ടണ്‍: ഇറാഖിലും സിറിയയിലും യുഎസ് സേനക്ക് നേരെ വീണ്ടും ആക്രമണം. ഇറാന്‍ പിന്തുണയുള്ള സംഘങ്ങളാണ് ആക്രമണത്തിന് പിന്നിലെന്ന് യുഎസ് സംശയിക്കുന്നതായാണ് റിപ്പോര്‍ട്ട്. ഇസ്രായേല്‍-ഹമാസ് സംഘര്‍ഷം ആരംഭിച്ചതിന് പിന്നാലെയാണ് യുഎസ് സേനക്ക് നേരെയുള്ള ആക്രമണങ്ങളും ശക്തമായത്.
ബുധനാഴ്ച സിറിയയില്‍ യുഎസ് സൈന്യത്തിന് നേരെയുണ്ടായ ആക്രമണത്തില്‍ സൈനികര്‍ക്ക് പരിക്കേറ്റിരുന്നു. വ്യാഴാഴ്ച ഇറാഖിലെ അയന്‍ അല്‍-അസദിലെ സൈനിക ക്യാമ്പിന് നേരെയാണ് ഡ്രോണാക്രമണമുണ്ടായത്. ബാഗ്ദാദ് ഇന്റര്‍നാഷണല്‍ എയര്‍പോര്‍ട്ടിന് സമീപത്തുള്ള യു.എസ് ക്യാമ്പും ആക്രമിക്കപ്പെട്ടിരുന്നു.
ആക്രമണത്തിനുള്ള തിരിച്ചടി സംബന്ധിച്ച് താന്‍ ഇപ്പോള്‍ പ്രവചനം നടത്തുന്നില്ലെന്ന് പെന്റഗണ്‍ വക്താവ് ബ്രിഗേഡിയര്‍ ജനറല്‍ പാട്രിക് റൈഡര്‍ പറഞ്ഞു. യുഎസിനേയും മറ്റ് സേനകളേയും സംരക്ഷിക്കാനുള്ള നടപടിയുണ്ടാകുമെന്നും അദ്ദേഹം കൂട്ടിച്ചേര്‍ത്തു.
