ജനീവ: ഗാസയില് വെടിനിര്ത്തലിന് വീണ്ടും ഇസ്രയേലിനോട് അഭ്യര്ത്ഥിച്ച് ഐക്യരാഷ്ട്ര സഭ മേധാവി അന്റോണിയോ ഗുട്ടെറസ്. ഗാസയിലെ സ്ഥിതി വളരെ രൂക്ഷമാണെന്നും വെടിനിര്ത്തലിലൂടെ രക്തച്ചൊരിച്ചിലിന്റെ പേടി സ്വപ്നം അവസാനിപ്പിക്കണമെന്നും അദ്ദേഹം ആവശ്യപ്പെട്ടു. കാഠ്മണ്ഡു സന്ദര്ശിക്കവെയാണ് ഗുട്ടെറസ് ഇക്കാര്യം വ്യക്തനമാക്കിയത്.
അന്താരാഷ്ട്ര സമൂഹത്തിന്റെ പിന്തുണയോടെ ആവശ്യമായ മാനുഷിക സഹായം എത്തിക്കുന്നതിനു പകരം ഇസ്രയേല് സൈനിക പ്രവര്ത്തനങ്ങള് കര്ശനമാക്കിയതില് ഞാന് ഖേദിക്കുന്നു. കൊല്ലപ്പെട്ടതും പരുക്കേറ്റതുമായ സാധാരണക്കാരുടെ എണ്ണം ഒരിക്കലും അംഗീകരിക്കാനാകാത്തതാണ്. നമ്മുടെ കണ്മുന്നില് നടക്കുന്ന മാനുഷിക ദുരന്തത്തിനാണ് ലോകം സാക്ഷ്യം വഹിക്കുന്നതെന്നും അദ്ദേഹം പറഞ്ഞു.
അതേസമയം, ഗാസ മുനമ്പില് ടെലികമ്മ്യൂണിക്കേഷന് പതുക്കെ പുനസ്ഥാപിക്കുന്നുണ്ടെന്നാണ് റിപ്പോര്ട്ടുകള്. കഴിഞ്ഞ രാത്രി മുഴുവന് ഗാസയില് ഇസ്രയേലിന്റെ കര-വ്യോമ ആക്രമണങ്ങള് തുടര്ന്നിരുന്നു. വെസ്റ്റ്ബാങ്കിലും കഴിഞ്ഞ ദിവസം രാത്രി നടന്ന റെയ്ഡില് മൂന്ന് പേര് കൊല്ലപ്പെട്ടു. നിലവില് 7,703 പലസ്തീനികളും 1400 ഇസ്രയേലികളുമാണ് കൊല്ലപ്പെട്ടത്.