കിളിമാനൂർ : നിർമാണം പൂർത്തിയായി മാസങ്ങൾ കഴിഞ്ഞിട്ടും വൈദ്യുതി കണക്ഷൻ വൈകുന്നതുമൂലം തുറന്നുനൽകാനാകാതെ നഗരൂർ ഗ്രാമപ്പഞ്ചായത്തിലെ വഴിയോരവിശ്രമകേന്ദ്രം. പഞ്ചായത്തിന്റെ ആൽത്തറമൂട്ടിലുള്ള കുടുംബാരോഗ്യകേന്ദ്രം വളപ്പിലാണ് വഴിയോരവിശ്രമകേന്ദ്രം നിർമിച്ചിട്ടുള്ളത്.
മാസങ്ങൾക്കു മുൻപ് നിർമാണം പൂർത്തിയായി ഉപയോഗയോഗ്യമാക്കിയെങ്കിലും വൈദ്യുതി കണക്ഷൻ ലഭ്യമാക്കാനാകാത്തതുമൂലമാണ് തുറക്കാൻ വൈകുന്നതെന്നാണ് അധികൃതർ പറയുന്നത്.
പഞ്ചായത്തിലെ വെള്ളല്ലൂർ പാളയം മാർക്കറ്റിൽ മറ്റൊരു വിശ്രമകേന്ദ്രംകൂടി നിർമിച്ചിട്ടുണ്ട്. പകൽ ഇതു തുറന്നുനൽകുന്നതിനു കുടുംബശ്രീയെ ചുമതലപ്പെടുത്തിയിട്ടുണ്ട്. രണ്ട് വിശ്രമകേന്ദ്രങ്ങൾക്കുമായി 11 ലക്ഷം രൂപയാണ് ചെലവിട്ടത്. പ്രധാന പാതയായ ആലംകോട്-കിളിമാനൂർ റോഡ് (രാജാരവിവർമ്മ റോഡ്) കടന്നുപോകുന്ന ഭൂരിഭാഗം പ്രദേശങ്ങളും നഗരൂർ ഗ്രാമപ്പഞ്ചായത്തിലാണ്.
തിരക്കേറിയ റോഡിന്റെ വശങ്ങളിൽ എങ്ങും പഞ്ചായത്തിന് ഇടമില്ലാത്തതിനാലാണ് കുടുംബാരോഗ്യകേന്ദ്രം വളപ്പിലേക്ക് വഴിയോരവിശ്രമകേന്ദ്രം നിർമിച്ചത്. യാത്രക്കാർക്ക് ഉപയോഗിക്കാൻ സൗകര്യപ്രദമായ ഇടമല്ലെങ്കിലും, ഒരു സൂചന ബോർഡ് സ്ഥാപിച്ച് പ്രശ്നം പരിഹരിക്കാനാകും. എന്നാൽ ലക്ഷങ്ങൾ ചെലവിട്ട് വിശ്രമകേന്ദ്രം നിർമിച്ചു മാസങ്ങളായിട്ടും വൈദ്യുതി കണക്ഷൻ എത്തിക്കാനോ, പകൽ നേരമെങ്കിലും തുറന്നുനൽകാനോ അധികൃതർ തയ്യാറാകുന്നില്ല.
ജനങ്ങളുടെ ബുദ്ധിമുട്ടുകൾ പരിഹരിക്കാനും, സൗകര്യങ്ങൾ വർധിപ്പിക്കാനുമായി ലക്ഷങ്ങൾ ചെലവിട്ട് നടപ്പിലാക്കുന്ന പദ്ധതികൾ നിസാര പ്രശ്നങ്ങളിലുടക്കി ജനങ്ങൾക്ക് ഉപകരിക്കാനാകാതെ പോവുകയാണ്.
