മാരുതി സുസുക്കിയുടെ മോഡലുകൾ വിൽപ്പനയിൽ പുത്തൻ നാഴികക്കല്ലുകൾ സ്വന്തമാക്കുന്നതു പതിവു സംഭവമായിട്ടുണ്ട്. കമ്പനിയുടെ പ്രീമിയം ഹാച്ച്ബാക്കായ ‘ബലേനൊ’യുടെ വിൽപ്പന 10 ലക്ഷം യൂണിറ്റ് പിന്നിതു കഴിഞ്ഞ ദിവസമായിരുന്നു. അരങ്ങേറ്റം കുറിച്ച് ആറു വർഷത്തിനുള്ളിലാണ് ‘ബലേനൊ’ ഈ തകർപ്പൻ നേട്ടം സ്വന്തമാക്കിയത്.
ഇപ്പോഴിതാ കോംപാക്ട് എസ് യു വിയായ വിറ്റാര ബ്രേസയുടെ ഇതുവരെയുള്ള ആകെ വിൽപ്പനയും ഏഴു ലക്ഷം യൂണിറ്റ് കവിഞ്ഞു. 2016ലെ ഓട്ടോ എക്സ്പോയിൽ അരങ്ങേറ്റം കുറിച്ച ‘വിറ്റാര ബ്രേസ’, നിരത്തിലെത്തി ആറു വർഷത്തിനുള്ളിലാണ് ഈ നേട്ടം കൈവരിച്ചത്. കൃത്യമായി പറഞ്ഞാൽ അഞ്ചു വർഷവും ഒൻപതു മാസവും (അഥവാ 69 മാസം) കൊണ്ടാണു ‘വിറ്റാര ബ്രേസ’ വിൽപ്പന ഏഴു ലക്ഷം യൂണിറ്റിലെത്തിയത്. മാരുതി സുസുക്കിയുടെ വിവിധോദ്ദേശ്യ വാഹന(എം പി വി)മായ ‘എർട്ടിഗ’ ഈ നേട്ടം സ്വന്തമാക്കിയത് ഒൻപതു വർഷവും ഒൻപതു മാസവും കൊണ്ടായിരുന്നു. ‘ബലേനൊ’യാവട്ടെ 72 മാസത്തിനകം വിൽപ്പന 10 ലക്ഷം യൂണിറ്റ് തികച്ചു. ഹാച്ച്ബാക്കായ ‘സ്വിഫ്റ്റ്’ 16 വർഷത്തനിടെ കൈവരിച്ചത് 25 ലക്ഷം യൂണിറ്റ് വിൽപ്പനയാണ്.
You must be logged in to post a comment Login