ആലപ്പുഴ: സംസ്ഥാനത്ത് സിൽവർ ലൈൻ പദ്ധതിക്കെതിരെ പ്രതിഷേധം ശക്തം. കെ റെയിൽ ബോധവൽക്കരണത്തിന് ആരും വരരുതെന്ന പോസ്റ്റർ പതിപ്പിച്ചാണ് ഇത്തവണത്തെ പ്രതിഷേധം. വീടിന്റെ ഗേറ്റിന് പുറത്ത് മതിലിൽ പതിപ്പിച്ചാണ് ചെങ്ങന്നൂരിലെ നാട്ടുകാരുടെ പ്രതിഷേധം. പദ്ധതിയുടെ ബോധവൽക്കരണത്തിനായി എത്തിയ സി പി എം നേതാക്കളെ തിരിച്ചയച്ചതിന് പിന്നാലെയാണ് പ്രദേശത്തെ പത്തോളം വീടുകളുടെ മതിലിൽ പ്രദേശത്തുകാർ പോസ്റ്റർ പതിപ്പിച്ചത്.
‘കെ റെയിൽ അനുകൂലികൾ ബോധവൽക്കരണത്തിനായി വരരുതെന്നും’ പോസ്‌റ്ററിൽ പറയുന്നു. ഒരു ന്യായീകരണവും കേൾക്കാൻ തയ്യാറല്ലെന്നും കിടപ്പാടം വിട്ടിറങ്ങില്ലെന്നും നാട്ടുകാർ ബോധവത്കരണത്തിനെത്തിയവരോട് പറയുകയും ചെയ്തു. തുടർന്ന് വിശദീകരണ ലഘുലേഖകൾ പോലും വാങ്ങാൻ നാട്ടുകാർ തയ്യാറായില്ല.
വെൺമണി പഞ്ചായത്തിൽ 1.70 കിലോമീറ്റർ ഭാഗമാണ് സിൽവർ ലൈൻ പദ്ധതിയിൽ ഉൾപ്പെട്ടിട്ടുള്ളത്. ഇതിനായി 2.06 ഹെക്‌ടർ ഭൂമി ഏറ്റെടുക്കേണ്ടി വരും. ഇതോടെ മുളക്കുഴ, വെൺമണി പഞ്ചായത്തുകളിലായി 67 വീടുകൾ പൂർണമായും 43 വീടുകൾ ഭാഗികമായും നഷ്ടപ്പെടും എന്നുള്ളതാണ് നാട്ടുകാരുടെ ആശങ്ക.
You must be logged in to post a comment Login