എയർടെൽ തങ്ങളുടെ ഉപയോക്താക്കൾക്ക് സൌജന്യമായി 1 ജിബി ഡാറ്റ നൽകുന്നു

ഇന്ത്യയിലെ ഏറ്റവും വലിയ രണ്ടാമത്തെ ടെലിക്കോം കമ്പനിയായ എയർടെൽ ആകർഷകമായ ഓഫറുകൾ കൊണ്ടാണ് ജനപ്രിയമാകുന്നത്. ഇപ്പോൾ എയർടെൽ തങ്ങളുടെ തിരഞ്ഞെടുത്ത ഉപഭോക്താക്കൾക്ക് സൗജന്യ ഡാറ്റ നൽകുന്നു. ഉപയോക്താക്കൾക്ക് 1 ജിബി സൗജന്യ ഹൈ-സ്പീഡ് ഇന്റർനെറ്റ് ഡാറ്റയാണ് എയർടെൽ നൽകുന്നതെന്ന് റിപ്പോർട്ടുകൾ വ്യക്തമാക്കുന്നു. ഇത് കൂടുതൽ ഉപഭോക്താക്കളെ തങ്ങളുടെ നെറ്റ്വർക്കിലേക്ക് ആകർഷിക്കുന്നതിനുള്ള എയർടെല്ലിന്റെ പുതിയ ഓഫറാണ്. ഈ പ്ലാൻ എല്ലാ ഉപയോക്താക്കൾക്കും ലഭിക്കില്ല എന്നാണ് ശ്രദ്ധേമായ കാര്യം.

ഓൺലിടെക്കിൽ നിന്നുള്ള റിപ്പോർട്ട് അനുസരിച്ച് പുതിയ കോംപ്ലിമെന്ററി 1ജിബി ഡാറ്റ ഓഫർ സ്മാർട്ട് പ്ലാനുകളിലുള്ളവർക്ക് മാത്രമാണ് ലഭ്യമാകുക. എയർടെൽ തിരഞ്ഞെടുത്ത ഉപഭോക്താക്കൾക്ക് ഒരു എസ്എംഎസ് അയയ്ക്കുന്നുവെന്നും ആ മെസേജ് ലഭിക്കുന്നവർക്ക് ഡാറ്റ വൗച്ചറിന്റെ രൂപത്തിൽ സൗജന്യ 1 ജിബി ഡാറ്റ ക്രെഡിറ്റ് ചെയ്ത് നൽകുന്നുവെന്നും റിപ്പോർട്ടിൽ പറയുന്നു. നിങ്ങൾക്ക് ഈ ഓഫർ ലഭിച്ചിട്ടുണ്ടെങ്കിൽ എയർടെല്ലിന്റെ ഔദ്യോഗിക ആപ്പ് വഴി നിങ്ങൾക്ക് അത് ക്ലെയിം ചെയ്യാൻ കഴിയും. സൗജന്യ ഡാറ്റ വൗച്ചർ ഇന്ന് മാത്രം വാലഡിറ്റിയുള്ളതായിരിക്കും. അതുകൊണ്ട് നിങ്ങൾക്ക് ഈ വൌച്ചർ ലഭിച്ചിട്ടുണ്ട് എങ്കിൽ വേഗം ക്ലൈം ചെയ്യുക.

എയർടെൽ താങ്ക്സ് ആപ്പിലെ കൂപ്പൺസ് വിഭാഗത്തിൽ ഡാറ്റ വൗച്ചർ കാണാൻ സാധിക്കും. നിങ്ങൾ ഭാഗ്യവാനാണെങ്കിൽ നിങ്ങൾക്കും അത് ലഭിച്ചിരിക്കും. അതുകൊണ്ട് എയർടെൽ ആപ്പിൽ പോയി ഈ ഓഫർ ലഭിച്ചിട്ടുണ്ടോ എന്ന് പരിശോധിക്കാം. സാധാരണയായി 99 രൂപയുടെ സ്മാർട്ട് പായ്ക്ക് അടക്കമുള്ള കുറഞ്ഞ തുകയുള്ള റീചാർജ് പ്ലാനുകൾ തിരഞ്ഞെടുക്കുന്ന ഉപഭോക്താക്കൾക്ക് സൗജന്യ ഡാറ്റ വൗച്ചർ നൽകുന്നതായും റിപ്പോർട്ടുണ്ട്. ഇത്തരം ഉപഭോക്താക്കൾ അവരുടെ ഡാറ്റ വൌച്ചർ ക്ലെയിം ചെയ്താൽ 15 മിനിറ്റിനുള്ളിൽ സൌജന്യ ഡാറ്റ ഡാറ്റ ലഭിക്കുമെന്ന് റിപ്പോർട്ട് പറയുന്നു.