മുൻനിര സ്മാർട് ഫോൺ ബ്രാൻഡ് ഒപ്പോയുടെ പുതിയ ഹാൻഡ്സെറ്റ് റെനോ 8 സീരീസിൽ റെനോ 8 ലൈറ്റ് 5ജി അവതരിപ്പിച്ചു. പുതിയ ഫോൺ റെനോ 8 ന് താഴെയാണ് വരുന്നത്. എന്നാൽ ഇത് ഒപ്പോയുടെ ആഭ്യന്തര വിപണിയായ ചൈനയ്ക്ക് പകരം സ്പെയിനിൽ ആണ് അവതരിപ്പിച്ചിരിക്കുന്നത്. ഒപ്പോ റെനോ 7 ലൈറ്റിന്റെ പരിഷ്കരിച്ച പതിപ്പാണ് റെനോ 8 ലൈറ്റ് 5ജി. പുതിയ റെനോ 8 ലൈറ്റിന്റെ ഫീച്ചറുകളും ഒപ്പോ എഫ് 21 പ്രോയുടേതിന് സമാനമാണ്.
സ്പെയിനിൽ അവതരിപ്പിച്ച ഒപ്പോ റെനോ 8 ലൈറ്റ് 5ജി യുടെ വില 429 യൂറോയാണ് ( ഏകദേശം 35,500 രൂപ). ഒരൊറ്റ മെമ്മറി കോൺഫിഗറേഷനിലാണ് ഈ ഹാൻഡ്സെറ്റ് വരുന്നത്. ബ്ലാക്ക്, റെയിൻബോ എന്നീ കളർ വേരിയന്റുകളിലാണ് ഫോൺ എത്തുന്നത്. കമ്പനിയുടെ ഓൺലൈൻ സ്റ്റോർ വഴി ഫോൺ ഇപ്പോൾ സ്പെയിനിൽ വാങ്ങാൻ ലഭ്യമാണെങ്കിലും ഇന്ത്യ ഉൾപ്പെടെയുള്ള വിപണികളിലേക്ക് വരുന്നത് സംബന്ധിച്ച് വ്യക്തതയില്ല.
റെനോ 8 ലൈറ്റ് 5ജിയിൽ 60Hz റഫ്രഷ് റേറ്റുള്ള 6.43-ഇഞ്ച് ഫുൾഎച്ച്‌ഡി അമോലെഡ് ഡിസ്‌പ്ലേയാണ് ലഭിക്കുന്നത്. 8 ജിബി റാമും 128 ജിബി ഇന്റേണൽ സ്റ്റോറേജും ജോടിയാക്കിയ ക്വാല്‍കോം സ്നാപ്ഡ്രാഗൺ 695 പ്രോസസറാണ് ഇത് നൽകുന്നത്. റെനോ 8 ലൈറ്റ് 5ജിയിൽ ഒരു മെമ്മറി കോൺഫിഗറേഷൻ മാത്രമാണെങ്കിലും 128 ജിബിയിൽ കൂടുതൽ സ്റ്റോറേജ് വർധിപ്പിക്കണമെങ്കിൽ മൈക്രോ എസ്ഡി കാർഡ് (1ടിബി വരെ) ഉപയോഗിക്കാം. ഡൈനാമിക് റാം എക്സ്പാൻഷൻ ഫീച്ചറിന്റെ സഹായത്തോടെ റാം 5 ജിബി വരെ വികസിപ്പിക്കാനും കഴിയും. ഇത് ഉപയോഗിക്കാത്ത ഇന്റേണൽ മെമ്മറിയിൽ ഒരുഭാഗം റാം ആയി ഉപയോഗിക്കും.
റെനോ 8 ലൈറ്റ് 5ജി യുടെ പിൻഭാഗത്ത് മൂന്ന് ക്യാമറകളുണ്ട്. 64 മെഗാപിക്സൽ പ്രധാന ക്യാമറ, 2 മെഗാപിക്സൽ മാക്രോ ക്യാമറ, 2 മെഗാപിക്സൽ മോണോക്രോം ക്യാമറ എന്നിവ ചതുരാകൃതിയിൽ അടുക്കിവച്ചിരിക്കുന്നു. സെൽഫികൾക്കായി ഡിസ്പ്ലേയുടെ മുകളിൽ ഇടത് കോണിൽ പഞ്ച്-ഹോളിനുള്ളിൽ 16-മെഗാപിക്സൽ ക്യാമറയുണ്ട്. 33W വരെ വേഗത്തിൽ ചാർജ് ചെയ്യാവുന്ന 4,500 എംഎഎച്ച് ആണ് ബാറ്ററി. ആൻഡ്രോയിഡ് 12 അടിസ്ഥാനമാക്കിയുള്ള കളർഒഎസ് 12 ആണ് ഒഎസ്.
You must be logged in to post a comment Login