ന്യൂഡൽഹി: രാജ്യത്ത് എച്ച് 3 എൻ 2 വലിയ തോതിൽ വ്യാപിക്കില്ലെന്ന് പ്രതീക്ഷിക്കുന്നതായി ഇന്ത്യൻ മെഡിക്കൽ അസോസിയേഷൻ (ഐഎംഎ) പ്രസിഡന്‍റ് ഡോ ശരത് കുമാർ അഗർവാൾ . രോഗമുക്തി നേടാൻ കൂടുതൽ സമയം വേണ്ടിവരും. ഗർഭിണികൾ, വാർദ്ധക്യസഹജമായ അസുഖങ്ങളുള്ളവർ, കുട്ടികൾ എന്നിവർ ജാഗ്രത പാലിക്കണം.
വായുവിലൂടെ രോഗം പകരുന്നതിനാൽ മാസ്കുകളും സാനിറ്റൈസറുകളും ഉപയോഗിക്കുന്നത് തുടരണമെന്നും ശരത് കുമാർ അഗർവാൾ പറഞ്ഞു. എച്ച് 3 എൻ 2 പടരാതിരിക്കാൻ കൊവിഡ് വ്യാപനം തടയാൻ സ്വീകരിച്ച നടപടികൾ തന്നെ പാലിക്കണമെന്നും അദ്ദേഹം പറഞ്ഞു.
എച്ച് 3 എൻ 2 പകർച്ചവ്യാധി മൂലം രാജ്യത്ത് ഇതുവരെ രണ്ട് പേർ മരിച്ചു. ഹരിയാനയിലും കർണ്ണാടകയിലുമാണ് ആളുകൾ മരിച്ചത്. എച്ച് 3 എൻ 2 ഉൾപ്പെടെ സീസണൽ ഇൻഫ്ലുവൻസയ്ക്ക് കാരണമാകുന്ന വൈറസ് രാജ്യത്തുടനീളം 3,038 പേർക്ക് ബാധിച്ചതായി ആരോഗ്യ മന്ത്രാലയം അറിയിച്ചു. സംസ്ഥാനത്ത് 10 പേരിൽ ഇതിനകം എച്ച് 3 എൻ 2 ഇൻഫ്ലുവൻസ കണ്ടെത്തിയതായും ആരോഗ്യവകുപ്പ് അറിയിച്ചു.
