നമ്മൾ ദിവസവും പല്ല് തേയ്‌ക്കാറുണ്ട്. രാവിലെയും രാത്രിയും ബ്രഷ് ചെയ്താല്‍ തന്നെ വായ്‌ക്കകത്ത് വരുന്ന പല രോഗങ്ങളും അണുബാധകളുമെല്ലാം തടയാൻ കഴിയും.
ബ്രഷ് ചെയ്യാൻ ഇന്ന് ചിലര്‍ ഇലക്ട്രിക് ടൂത്ത് ബ്രഷിലേക്ക് ചുവടുമാറിയിട്ടുമുണ്ട്. ഇലക്ട്രിക് ടൂത്ത് ബ്രഷ് എന്ന് കേള്‍ക്കുമ്പോള്‍ തന്നെ അധികപേരും ഇതൊന്നും നമുക്ക് വേണ്ട എന്നാണ് ആദ്യമേ കരുതുക. എന്നാൽ ഇതിന്റെ ഗുണങ്ങൾ അറിഞ്ഞാൽ ആരായാലും വാങ്ങിപ്പോകും.
ഇലക്ട്രിക് ടൂത്ത് ബ്രഷുകൊണ്ടുള്ള പ്രധാന പ്രയോജനം അത് പല്ലുകളും വായ്‌ക്കകവും നല്ലതുപോലെ വൃത്തിയാക്കും എന്നതാണ്. പല്ലുകളിലും, പല്ലുകള്‍ക്കിടയിലും അടിഞ്ഞിരിക്കുന്ന അഴുക്ക് കളയാൻ ഇലക്ട്രിക് ടൂത്ത് ബ്രഷ് സഹായിക്കുന്നത് പോലെ ഒരിക്കലും സാധാരണ ബ്രഷുകള്‍ക്ക് കഴിയില്ല.
ഇലക്ട്രിക് ടൂത്ത് ബ്രഷുകളുടെ, ബ്രഷ് ചെയ്യുന്ന ഭാഗം യഥേഷ്ടം സ്വയം ചലിക്കാൻ കഴിയുന്നതാണ്. അതിനാല്‍ തന്നെ വായ്‌ക്കകം മുഴുവനും എത്തി, വൃത്തിയാക്കാൻ അതിന് കഴിയും. മോണരോഗം അടക്കം വായില്‍ കാണുന്ന പല രോഗങ്ങളെയും ചെറുക്കാനിത് ഒരുപാട് നല്ലതാണ്.
ചില അസുഖങ്ങള്‍ മൂലം വലയുന്ന ആളുകളെ സംബന്ധിച്ച് ഉപയോഗിക്കാൻ വളരെയധികം സഹായകമാണ് ഇലക്ട്രിക് ബ്രഷ്. കൈകള്‍ അധികം അനക്കാതെ തന്നെ വായ്‌ക്കകം നന്നായി വൃത്തിയാക്കും. കൈകള്‍ അധികം അനക്കാർനോ, അധികം ശക്തിയെടുക്കാനോ പ്രയാസമുള്ളവരെ സംബന്ധിച്ച് ഏറെ സൗകര്യം.
