ചിന്തയുടെ പ്രബന്ധം പരിശോധിച്ച് ബോധ്യപ്പെട്ടത്: വീഴ്ചകൾ ഇല്ലെന്ന് ഗൈഡ്

തിരുവനന്തപുരം: ചിന്ത ജെറോം കേരള സർവകലാശാലയിൽ സമർപ്പിച്ച പ്രബന്ധം പരിശോധിച്ച് ബോധ്യപ്പെട്ടതാണെന്നും അതിൽ വീഴ്ചയുണ്ടായിട്ടില്ലെന്നും കേരള വിസിക്ക് വിശദീകരണം നൽകി ചിന്തയുടെ ഗൈഡ് കൂടിയായ മുൻ പിവിസി ഡോ. പി.പി. അജയകുമാർ.

ചങ്ങമ്പുഴയുടെ വാഴക്കുലയെന്ന കൃതി വൈലോപ്പിള്ളിയുടേതാണെന്ന് പ്രബന്ധത്തിൽ പരാമർശിച്ചത് നോട്ടപ്പിശകാണെന്നും തെറ്റ് തിരുത്തി പ്രബന്ധം അച്ചടിച്ച് പ്രസിദ്ധീകരിക്കുമെന്നും ഡോ. അജയകുമാർ വിസിക്ക് മറുപടി നൽകി. പ്രബന്ധം നിരവധി ലേഖനങ്ങളിൽ നിന്ന് പകർത്തിയതാണെന്നും അക്ഷരത്തെറ്റും വ്യാകരണ പിശകുകളും നിരവധിയാണെന്നും ചൂണ്ടിക്കാട്ടി സർവകലാശാല വെബ്സൈറ്റിൽ അപ്ലോഡ് ചെയ്ത പ്രബന്ധം പിൻവലിക്കണമെന്ന് ആവശ്യപ്പെട്ട് സേവ് യൂണിവേഴ്സിറ്റി ക്യാമ്പയിൻ കമ്മിറ്റി നൽകിയ പരാതി പരിശോധിക്കാൻ ഗവർണർ വി.സിയോട് ആവശ്യപ്പെട്ടിരുന്നു. ഗൈഡിൽ നിന്ന് വിശദീകരണം ലഭിക്കാഞ്ഞതിനാൽ വി.സി ഇതുവരെ ഗവർണർക്ക് പ്രാഥമിക റിപ്പോർട്ട് സമർപ്പിച്ചിട്ടില്ല.

പ്രബന്ധത്തിന് മറ്റ് പ്രസിദ്ധീകരണങ്ങളുമായി 10 ശതമാനത്തിൽ താഴെ സാമ്യതയേ ഉള്ളൂവെന്നും യുജിസി വ്യവസ്ഥകൾക്കനുസൃതമായാണ് പരിശോധന നടത്തിയതെന്നും പ്രബന്ധം പൂർണ്ണമായും ഗവേഷകയുടെ സ്വന്തം കണ്ടെത്തലുകളാണെന്നും ഗൈഡിന്‍റെ വിശദീകരണത്തിൽ പറയുന്നു. വി.സി ആവശ്യപ്പെട്ടതനുസരിച്ച് ചിന്തയുടെ പി.എച്ച്.ഡി പ്രവേശനവുമായി ബന്ധപ്പെട്ട ഫയലുകളും പ്രബന്ധം വിലയിരുത്തിയ പ്രൊഫസർമാരുടെ റിപ്പോർട്ടുകളും ഓപ്പൺ ഡിഫൻസ് രേഖകളും രജിസ്ട്രാർ സമർപ്പിച്ചു.