വർക്കല: തിരുവിതാംകൂർ ദേവസ്വം ബോർഡിന് കീഴിലുള്ള പാളയംകുന്ന് ശ്രീകണ്ഠ ശാസ്താക്ഷേത്രത്തിലെ ഉത്സവത്തോടനുബന്ധിച്ചുള്ള എഴുന്നള്ളത്തിനിടെ ആനയിടഞ്ഞ് പരിഭ്രാന്തി പരത്തുകയും രണ്ടുപേർക്ക് പരിക്കേൽക്കുകയും ചെയ്ത സംഭവത്തിൽ ആറ്റിങ്ങൽ സോഷ്യൽ ഫോറസ്ട്രി റേഞ്ച് ഓഫീസ് കേസ് രജിസ്റ്റർ ചെയ്തു. സംഭവത്തിൽ വാഹനങ്ങൾക്കും കേടുപാടുണ്ടായി.
ആനയെ ഉപയോഗിക്കുന്നതിന് നിയമപ്രകാരമുള്ള അനുമതി നേടാത്തതിനും നാട്ടാന പരിപാലന ചട്ടങ്ങളുടെ ലംഘനത്തിനും ക്ഷേത്ര കമ്മിറ്റി പ്രസിഡന്റ്, സെക്രട്ടറി, ആനയുടെ ഉടമസ്ഥൻ എന്നിവർക്കെതിരെ അന്വേഷണം നടത്തുന്നതായി ഫോറസ്റ്റ് റേഞ്ച് ഓഫീസർ ഷൈജു അറിയിച്ചു.