തമിഴ്നാട്ടിലെ കനത്ത വെള്ളപ്പൊക്കത്തെ തുടര്ന്ന് സംസ്ഥാനത്തിന്റെ പല ഭാഗങ്ങളിലുമുണ്ടായ നാശ നഷ്ടങ്ങള്ക്ക് കേന്ദ്ര സര്ക്കാര് മതിയായ ദുരിതാശ്വാസ ഫണ്ട് അനുവദിക്കുന്നില്ലെന്ന് ആരോപിച്ച് മുഖ്യമന്ത്രി എം.കെ സ്റ്റാലിന്. ‘ഈ പ്രതിസന്ധി ഘട്ടത്തില്, കേന്ദ്ര സര്ക്കാര് തമിഴ്നാടിന് കൂടുതല് ഫണ്ട് അനുവദിക്കാത്തതിനാല്, ജനങ്ങളുടെ ക്ഷേമത്തിനും, ദുരിതാശ്വാസ പ്രവര്ത്തനങ്ങള്ക്കുമായി സംസ്ഥാന സര്ക്കാര് സ്വന്തം ഫണ്ട് ഉപയോഗിക്കുന്നു’-സ്റ്റാലിന് പറഞ്ഞു.
ദേശീയ ദുരന്തനിവാരണ നിധിയില് നിന്ന് കേന്ദ്രം സംസ്ഥാനത്തിന് കൂടുതല് തുക അനുവദിച്ചിട്ടില്ലെന്നും, അനുവദിച്ച 450 കോടി രൂപ സംസ്ഥാന ദുരിതാശ്വാസ നിധിയിലേക്ക് കേന്ദ്രം നല്കാനുള്ള ഫണ്ടിന്റെ രണ്ടാം ഗഡുവാണെന്നും സ്റ്റാലിന് ആരോപിച്ചു. എന്ഡിആര്എഫില് നിന്ന് ഉടന് പണം അനുവദിക്കണമെന്ന് തമിഴ്നാട്ടിലെ ജനങ്ങള്ക്ക് വേണ്ടി ഞാന് കേന്ദ്ര സര്ക്കാരിനോട് ആവര്ത്തിച്ച് അഭ്യര്ത്ഥിക്കുന്നുവെന്നും അദ്ദേഹം പറഞ്ഞു.
സംസ്ഥാനത്തെ പ്രളയക്കെടുതി വിലയിരുത്തുന്നതിനും കൂടുതല് കേന്ദ്രസഹായം തേടുന്നതിനുമായി മുഖ്യമന്ത്രി ബുധനാഴ്ച ഡല്ഹിയില് വച്ച് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയിരുന്നു. കൂടിക്കാഴ്ചയില് തെക്കന് തമിഴ്നാട്ടിലെ വെള്ളപ്പൊക്ക പ്രതിസന്ധി പരിഹരിക്കാന് പ്രാഥമിക ധനസഹായമായി 2000 കോടി രൂപ ആവശ്യപ്പെട്ടിരുന്നുവെന്നും മുഖ്യമന്ത്രി പറഞ്ഞു.