തിരുവനന്തപുരം: തിരുവനന്തപുരം വിമാനത്താവളത്തിലെ അന്താരാഷ്ട്ര ടെര്മിനലില് നിന്നുള്ള ആഭ്യന്തര സര്വീസുകള് ശംഖുംമുഖത്തെ ഡൊമസ്റ്റിക് ടെര്മിനലിലേക്ക് മാറ്റണമെന്ന് നിര്ദേശം. കസ്റ്റംസ് വിഭാഗമാണ് നിര്ദേശം നല്കിയിരിക്കുന്നത്. തീരുമാനം എയര് ഇന്ത്യ എക്സ്പ്രസ് നടത്തുന്ന ആഭ്യന്തര സര്വീസുകളെയാണ് ഈ നിര്ദേശം പ്രധാനമായും ബാധിക്കുക.
ഇതേ തുടര്ന്ന് തിരുവനന്തപുരം- കോഴിക്കോട് സെക്ടറില് എയര് ഇന്ത്യ എക്സ്പ്രസ് പ്രഖ്യാപിച്ച പുതിയ സര്വീസ് ആരംഭിക്കാന് സാധിച്ചിട്ടില്ല. ബുക്കിങ് വരെ ആരംഭിച്ച ശേഷമാണ് കസ്റ്റംസ് വിഭാഗം എതിര്പ്പുമായി എത്തിയത്. യാത്രക്കാരുടെ നിരന്തര ആവശ്യത്തെത്തുടര്ന്നാണ് നിലവില് വിമാന സര്വീസ് ഇല്ലാതിരുന്ന തിരുവനന്തപുരം- കോഴിക്കോട് സെക്ടറില് എയര് ഇന്ത്യ എക്സ്പ്രസ് സര്വീസ് പ്രഖ്യാപിച്ചത്.
തിരുവനന്തപുരം വിമാനത്താവളത്തില് ചാക്കയിലെ അന്താരാഷ്ട്ര ടെര്മിനലില് നിന്നാണ് എയര് ഇന്ത്യ എക്സ്പ്രസ് ആഭ്യന്തര സര്വീസുകള് നടത്തുന്നത്. പുതുതായി പ്രഖ്യാപിച്ച കോഴിക്കോട് സര്വീസ് കൂടാതെ ഡല്ഹി, ചെന്നൈ, ബംഗളൂരു, കണ്ണൂര് എന്നിവടങ്ങളിലേക്ക് അന്താരാഷ്ട്ര ടെര്മിനലില് നിന്ന് എയര് ഇന്ത്യ എക്സ്പ്രസ് സര്വീസ് നടത്തുന്നുണ്ട്. ഡൊമസ്റ്റിക് ടെര്മിനലില് സര്വീസ് നടത്തുന്നതിന് വേണ്ട ഗ്രൗണ്ട് സ്റ്റാഫോ മറ്റു സംവിധാനങ്ങളോ എയര് ഇന്ത്യക്ക് നിലവിലില്ല. ഇരു ടെര്മിനലുകളും തമ്മില് ആറരക്കിലോമീറ്റര് ദൂരവുമുണ്ട്.