ബാലരാമപുരം: വിലപിടിപ്പുള്ള ബൈക്ക് മോഷ്ടിച്ച് ആർഭാട ജീവിതം നയിക്കുന്ന മോഷ്ടാക്കളെ ബാലരാമപുരം പൊലീസ് തമിഴ്നാട്ടിൽ നിന്ന് പിടികൂടി. പുതുവത്സരാഘോഷത്തിന് തമിഴ്നാട്ടിൽ നിന്ന് ബാലരാമപുരത്തെത്തി രണ്ട് വിലകൂടിയ ബൈക്കുകൾ മോഷ്ടിച്ച് കടന്ന സംഘത്തെയാണ് പൊലീസ് വലയിലാക്കിയത്.ബാലരാമപുരം സ്റ്റേഷൻ ഹൗസ് ഓഫിസർ വിജയകുമാറിന്റെ നേതൃത്വത്തിൽ നാല് സ്ക്വാഡുകൾ 72 മണിക്കൂർ ഇടതടവില്ലാതെ നടത്തിയ അന്വേഷണത്തിലാണ് പ്രതികളെ വലയിലാക്കിയത്. കന്യാകുമാരി ജില്ലയിലെ കൽക്കുളം കട്ടത്തുറൈ കല്ലാട്ടുവിളൈയിൽ സമുവലിനെയും (18), പ്രായപൂർത്തിയാകാത്ത ആളെയുമാണ് ബാലരാമപുരം പൊലീസ് പിടികൂടിയത്.
ശനിയാഴ്ച പുലർച്ചയാണ് സംഭവം. ബാലരാമപുരം തയ്ക്കാപ്പള്ളിക്ക് എതിർവശം പ്ലാവിള വീട്ടിൽ പ്രവീണിന്റെ ഉടമസ്ഥതയിലുള്ള ബൈക്ക് വീടിനു മുന്നിൽ നിന്നാണ് മോഷണം പോയത്. രണ്ടര ലക്ഷം രൂപ വിലവരുന്ന രണ്ട് ബൈക്കുകളാണ് മൂന്നംഗ സംഘം മോഷ്ടിച്ചത്. ജുവനൈൽ മോഷ്ടാവുൾപ്പെടെ അതിവൈദഗ്ധ്യമുള്ളവരാണ് മോഷണസംഘത്തിലുള്ളത്. ബാലരാമപുരത്ത് ദിവസങ്ങൾ മുമ്പെത്തി ബൈക്കുകളും സ്ഥലവും സ്കെച്ച് ചെയ്ത് പ്രദേശത്ത് എവിടെയെല്ലാം സി.സി ടി.വിയുണ്ടെന്ന് പരിശോധിച്ച ശേഷം ഇതിൽപെടാതെ വാഹനം കടത്തിക്കൊണ്ടുപോകുകയായിരുന്നു.