വാഹനം സ്വന്തമായുള്ളവരെല്ലാം അത് സർവ്വീസും ചെയ്യാറുണ്ടാകും. അധികം പഴക്കമില്ലാത്ത വാഹനങ്ങളാണെങ്കിൽ തീർച്ചയായും സർവ്വീസ് സെന്ററുകളിലാവും ഇതിനായി കൊണ്ടുപോവുക. പലപ്പോഴും നമ്മുടെ വാഹനം ഏറ്റെടുത്തുകഴിഞ്ഞാൽ അതിൽ എന്തൊക്കെയാണ് സർവ്വീസ് സെന്ററുകാർ ചെയ്യുക എന്നത് നാം കാണാറില്ല. എന്നാൽ, ഇത്തരത്തിൽ സർവ്വീസ് കഴിഞ്ഞ് നമ്മുടെ വാഹനം വാങ്ങുമ്പോൾ ചില കാര്യങ്ങൾ കൃത്യമായും ശ്രദ്ധിക്കണം. അവ എന്തൊക്കെയാണെന്ന് നോക്കാം.
എവിടെയാണോ വാഹനം സർവ്വീസിന് കൊടുക്കുന്നത് അവിടത്തെ നിയമസാധ്യതയും വിശ്വസ്തതയും ഉറപ്പാക്കിയതിന് ശേഷം മാത്രം വാഹനം കൈമാറുക എന്നതാണ് പ്രധാന കാര്യം. വാഹനം സർവ്വീസ് ചെയ്ത് തിരികെ നൽകിയ ഉടൻ നിങ്ങൾ പറഞ്ഞിട്ടുള്ള പ്രശ്നങ്ങൾ എല്ലാം പരിഹരിച്ചോ എന്ന് ഉറപ്പ് വരുത്തുക. അത് പരിശോധിച്ച് നോക്കാനുള്ള പൂർണ ഉത്തരവാദിത്വം നമുക്കുണ്ട്.
വാഹനം സര്‍വീസ് ചെയ്ത ശേഷം വിശദമായ ബില്‍ ഉടമയ്‌ക്ക് കൈമാറും. ബില്ല് വിശദമായി പരിശോധിക്കേണ്ടത് അനിവാര്യമാണ്. ഇനങ്ങളുടെ വില നിങ്ങള്‍ക്ക് നല്‍കിയിരിക്കുന്ന ക്വട്ടേഷനുമായി പൊരുത്തപ്പെടുന്നുണ്ടോ ഇല്ലയോ എന്ന് സ്ഥിരീകരിക്കാതെ ബില്‍ തുക അടക്കരുത്. എഞ്ചിന്‍ ഓയില്‍ ടോപ്പ് അപ്പ് ചെയ്യുമ്പോള്‍ പണം അടക്കേണ്ടതില്ല.
എഞ്ചിന്‍ ഓയില്‍ മാറ്റുന്നതിനാണ് പണം നൽകേണ്ടത്. ടോപ്പ് അപ്പ് ചെയ്തതിന് നിരക്ക് ഈടാക്കിയിട്ടില്ലെന്ന് സ്ഥിരീകരിക്കുക. വണ്ടിയുടെ ഏതെങ്കിലും ഭാഗങ്ങള്‍ മാറ്റിയത് വില കൂടുതലാണെന്ന് സംശയം തോന്നിയാല്‍ ഓൺലൈനായി അത് പരിശോധിക്കുക.
വാഹനത്തിന് കൃത്യമായി മാറ്റാനുള്ള ഒന്നാണ് എഞ്ചിൻ ഓയിൽ. അതിനാല്‍ വാഹനം സര്‍വീസ് ചെയ്ത് കഴിഞ്ഞശേഷമുള്ള ഓയിലിന്റെ നിറം പരിശോധിച്ച് അത് മാറ്റിയിട്ടുണ്ടോയെന്ന് ഉറപ്പ് വരുത്തണം. പുതിയ ഓയില്‍ കണ്ടാല്‍ തന്നെ നമുക്ക് മനസ്സിലാകും. അത് നല്ല ലൈറ്റ്‌വെയിറ്റായും വൃത്തിയുള്ളതുമായുമാണ് കാണപ്പെടുന്നത്.
വാഹനം സർവ്വീസ് കഴിഞ്ഞ് തിരികെ ലഭിച്ചാലുടൻ ഒന്ന് ഓടിച്ച് നോക്കുന്നത് നല്ലതാണ്. നാം ചൂണ്ടിക്കാട്ടിയ പരാതികൾ ഇപ്പോഴും നിലനിൽക്കുന്നുണ്ടെങ്കിൽ ഉടൻ തന്നെ സർവ്വീസ് സെന്റുകാരെ അറിയിക്കുക. സർവ്വീസ് ഫീഡ്ബാക്ക് നൽകുന്നതിനുമുമ്പുതന്നെ ഇതുചെയ്താൽ അധിക ചിലവില്ലാതെ കുഴപ്പം പരിഹരിക്കാനാവും.
