സംസ്ഥാനത്ത് ലോക്സഭ തെരഞ്ഞെടുപ്പ് നടക്കുന്നതിനാൽ ഏപ്രിൽ 26 ന് പൊതു അവധി പ്രഖ്യാപിച്ചു. സംസ്ഥാനത്തെ വാണിജ്യ സ്ഥാപനങ്ങൾ, സർക്കാർ ഓഫീസുകൾ വിദ്യാഭ്യാസ സ്ഥാപനങ്ങൾ എന്നിവയ്ക്ക് അടക്കമാണ് വോട്ടെടുപ്പ് നടക്കുന്ന ഏപ്രിൽ 26ന് അവധി പ്രഖ്യാപിച്ചിരിക്കുന്നത്.വാണിജ്യ സ്ഥാപനങ്ങൾ അടക്കമുള്ളവയ്ക്ക് ശമ്പളത്തോടയുള്ള അവധിയാണ് പ്രഖ്യാപിച്ചിട്ടുള്ളത്. നെഗോഷ്യബിൾ ഇൻസ്ട്രുമെന്റ്സ് ആക്ടിന്റെ പരിധിയിൽ വരുന്ന സർക്കാർ, അർദ്ധസർക്കാർ വാണിജ്യ സ്ഥാപനങ്ങൾക്കും സംസ്ഥാനത്ത് സർക്കാർ അവധി പ്രഖ്യാപിച്ച് ഉത്തരവിറക്കിയിട്ടുണ്ട്.
ലേബർ കമ്മീഷണറുടെ കൊമേഴ്സ്യൽ എസ്റ്റാബ്ലിഷ്മെന്റ് ആക്ടിന് പരിധിയിൽ വരുന്ന സ്വകാര്യസ്ഥാപനങ്ങൾ, സ്വകാര്യ വ്യവസായ കേന്ദ്രങ്ങൾ തുടങ്ങിയ ഇടങ്ങളിൽ അവധി പ്രഖ്യാപിക്കുന്നതിന് ആവശ്യമായ ക്രമീകരണങ്ങൾ ഏർപ്പെടുത്തണമെന്ന് നിർദ്ദേശിച്ചിരിക്കുന്ന ഉത്തരവിൽ അവധി ദിനത്തിൽ വേതനം നിഷേധിക്കുകയോ കുറവ് വരുത്തുകയോ ചെയ്യരുത് എന്നും നിർദ്ദേശിച്ചിട്ടുണ്ട്.ഏപ്രിൽ 26 വെള്ളിയാഴ്ച ലോക്സഭാ തെരഞ്ഞെടുപ്പ് നടക്കുന്നതിനോടനുബന്ധിച്ച് കേരളത്തിൽ ഇന്ന് വൈകുന്നേരം 6 മണി മുതൽ വോട്ടെടുപ്പ് ദിനമായ 26 ന് വൈകിട്ട് ആറുമണി വരെ മദ്യ വിൽപ്പന ശാലകൾ അടച്ചിടാനും തീരുമാനിച്ചിട്ടുണ്ട്. വോട്ടെണ്ണൽ ദിനമായ ജൂൺ നാലിനും സംസ്ഥാനത്ത് മദ്യ വിൽപ്പന ശാലകൾ പ്രവർത്തിക്കില്ല.