ന്യൂഡൽഹി: കോവിഡ് 19 പ്രതിരോധ വാക്‌സിനുകളായ കോവിഷീൽഡ്, കോവാക്സിൻ എന്നിവയുടെ മിശ്രിത പരീക്ഷണത്തിന് ശുപാർശ.വെല്ലൂർ മെഡിക്കൽ കോളേജാണ്(സിഎംസി) രണ്ടുവ്യത്യസ്ത വാക്‌സിനുകളുടെ ഡോസുകൾ ഒരാളിൽ പ്രയോഗിക്കുന്നത് സംബന്ധിച്ചുളള പഠനത്തിന് അപേക്ഷ സമർപ്പിച്ചത്. അപേക്ഷയെ കുറിച്ചുളള ചർച്ചയ്ക്കിടയിലാണ് ഇത് സംബന്ധിച്ച് ക്ലിനിക്കൽ പരീക്ഷണങ്ങൾ നടത്താൻ ക്രിസ്ത്യൻ മെഡിക്കൽ കോളേജിനോട് വിദഗ്ദ്ധ പാനൽ ആവശ്യപ്പെട്ടത്. കേന്ദ്ര ഡ്രഗ് സ്റ്റാൻഡേർഡ് കൺട്രോൾ ഓർഗനൈസേഷന്റെ വിദഗ്ധ സമിതിയാണ് രണ്ടുവാക്‌സിന്റെയും ഡോസുകൾ കൂട്ടിച്ചേർത്ത് നൽകുന്നത് സംബന്ധിച്ച് പഠനം നടത്താൻ ശുപാർശ ചെയ്തത്. കോവാക്സിൻ, കോവിഷീൽഡ് മിശ്രിതത്തിന്റെ നാലം ഘട്ട ക്ലിനിക്കൽ പരീക്ഷണം 300 സന്നദ്ധപ്രവർത്തകരെ ഉൾപ്പെടുത്തി നടത്തുന്നതിന് സിഎംസിക്ക് അനുമതി നൽകാൻ വിദഗ്ദ്ധ സമിതി ശുപാർശ ചെയ്തുവെന്ന് വാർത്താ ഏജൻസിയായ പി.ടി.ഐ. റിപ്പോർട്ട് ചെയ്തിട്ടുണ്ട്. ഒരു വ്യക്തിക്ക് രണ്ട് വ്യത്യസ്ത വാക്സിൻ ഡോസുകൾ നൽകാൻ കഴിയുമോ എന്ന് വിലയിരുകയാണ് ഈ പഠനത്തിന്റെ ലക്ഷ്യമെന്നും റിപ്പോർട്ടിൽ പറയുന്നു. ഇതിനുപുറമെ, ഭാരത് ബയോടെക്കിന്റെ കോവാക്സിൻ, മൂക്കിലൂടെ നൽകുന്ന വാക്സിൻ എന്നിവയുടെ മിശ്രിത പരീക്ഷണം നടത്താനും ശുപാർശയുണ്ട്. എന്നാൽ ഇതുസംബന്ധിച്ച് ഡ്രഗ് കൺട്രോളർ ജനറൽ ഓഫ് ഇന്ത്യയുടെ അന്തിമ തീരുമാനം വന്നിട്ടില്ല. 18 വയസ്സിന് മുകളിലുളളവരുടെ പരീക്ഷണങ്ങൾ സംബന്ധിച്ച കൂടുതൽ ഡേറ്റകൾ നൽകണമെന്ന് വിദഗ്ധ സമിതി ആവശ്യപ്പെട്ടു.
You must be logged in to post a comment Login