ഹഖ് സേ ഇന്ത്യ ; 2007 ടി-20 ലോകകപ്പിലെ ഇന്ത്യൻ വിജയം അണിയറയിൽ ഒരുങ്ങുന്നു

2007 ടി-20 ലോകകപ്പിലെ ഇന്ത്യൻ വിജയം ചിത്രീകരണത്തിനൊരുങ്ങുന്നു. ‘ഹഖ് സേ ഇന്ത്യ’ എന്ന് പേരിട്ടിരിക്കുന്ന ചിത്രത്തിൻ്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. ലോകകപ്പ് നേടിയ ടീമിൽ അംഗമായിരുന്ന മലയാളി പേസർ ശ്രീശാന്ത് തൻ്റെ സമൂഹമാധ്യമ അക്കൗണ്ടുകളിലൂടെ പോസ്റ്റർ പങ്കുവച്ചു.

ലണ്ടൻ ആസ്ഥാനമായ വൺ വൺ സിക്സ് നെറ്റ്‌വർക്ക് ലിമിറ്റഡ് നിർമ്മിക്കുന്ന ചിത്രം സൗഗത് ഭട്ടാചാര്യ സിനിമ സംവിധാനം ചെയ്യുന്നത്. ഒടിടിയിലാവും ചിത്രം റിലീസ് ചെയ്യുക എന്നാണ് റിപ്പോർട്ട്. സലിം-സുലൈമാൻ കൂട്ടുകെട്ടാണ് ചിത്രത്തിൻ്റെ സംഗീതം നിർവഹിക്കുന്നത്.

2007 ഏകദിന ലോകകപ്പിൽ ഗ്രൂപ്പ് ഘട്ടത്തിൽ തന്നെ പുറത്തായതോടെ യുവതാരങ്ങളെയാണ് ബിസിസിഐ ലോകകപ്പിനായി അയച്ചത്. എംഎസ് ധോണി ആദ്യമായി ഇന്ത്യയെ നയിക്കുന്നതും ദക്ഷിണാഫ്രിക്കയിൽ നടന്ന പ്രഥമ ടി-20 ലോകകപ്പിലായിരുന്നു. സെമിയിൽ കരുത്തരായ ഓസ്ട്രേലിയയെ 15 റൺസിനു കീഴടക്കിയ ഇന്ത്യ ഫൈനലിൽ എതിരാളികളായി പാകിസ്താൻ. ഏറെ നാടകീയ മുഹൂർത്തങ്ങൾക്കൊടുവിൽ 5 റൺസിന് പാകിസ്താനെ കീഴടക്കിയാണ് ഇന്ത്യ കിരീടം ചൂടിയത്. കായിക പ്രേമികൾക്ക് ഏറെ പ്രതീക്ഷ നൽകുന്ന സിനിമയാവും ഹഖ് സേ ഇന്ത്യ.