തിരുവനന്തപുരം: ആറ്റിങ്ങൽ സ്വദേശിയായ വിദ്യാര്‍ത്ഥിനിയുടെ മരണം ചികിത്സാ പിഴവ് മൂലമാണെന്ന് പരാതി. തിരുവനന്തപുരം മെഡിക്കല്‍ കോളേജില്‍ നിന്ന് ഡിസ്ചാര്‍ജ് ചെയ്ത് വീട്ടിലേയ്ക്ക് മടങ്ങവേയായിരുന്നു ആറ്റിങ്ങല്‍ പിരപ്പൻകോട്ടുകോണം സ്വദേശിയായ മീനാക്ഷി(18) മരിച്ചത്.
അലര്‍ജി ബാധിച്ച്‌ മെഡിക്കല്‍ കോളേജിലെത്തിയ മീനാക്ഷിയുടെ മരണം ചികിത്സാ പിഴവ് മൂലമെന്നാണ് ബന്ധുക്കള്‍ ആരോപിക്കുന്നത്.
മുക്കുപണ്ടം ധരിച്ചത് മൂലമുണ്ടായ അലര്‍ജിയ്ക്കാണ് മീനാക്ഷി മെഡിക്കല്‍ കോളേജില്‍ ചികിത്സ തേടിയത്. ഈ മാസം 17 മുതല്‍ 27 വരെ ചികിത്സയില്‍ തുടര്‍ന്നു. ഇന്നലെ ഡിസ്ചാര്‍ജ് ചെയ്ത് വീട്ടിലേയ്ക്ക് മടങ്ങുന്ന വഴി ദേഹാസ്വാസ്ഥ്യമുണ്ടാവുകയായിരുന്നു. ഉള്ളൂരില്‍ വെച്ച്‌ ഛര്‍ദ്ദിച്ചതിനെ തുടര്‍ന്ന് മീനാക്ഷിയെ തിരികെ മെഡിക്കല്‍ കോളേജിലെത്തിച്ചെങ്കിലും വൈകുന്നേരം നാലരയോടെ മരണം സംഭവിക്കുകയായിരുന്നു. ഹൃദയാഘാതമാണ് മരണകാരണം എന്നാണ് ആശുപത്രി അധികൃതര്‍ ബന്ധുക്കളെ അറിയിച്ചത്. ചികിത്സാ പിഴവുണ്ടെന്ന് ബന്ധുക്കള്‍ ഉന്നയിച്ചതോടെ ആറ്റിങ്ങല്‍ പൊലീസ് അസ്വാഭാവിക മരണത്തിന് കേസെടുത്തു. പോസ്റ്റ്മോര്‍ട്ടം റിപ്പോര്‍ട്ട് അടക്കം പരിശോധിച്ച ശേഷമായിരിക്കും തുടര്‍നടപടി സ്വീകരിക്കുക.
