ഡെറാഡൂണ്‍: ഉത്തരാഖണ്ഡ് തുരങ്ക അപകടത്തില്‍പ്പെട്ട് കുടുങ്ങിക്കിടക്കുന്നവരെ പുറത്തെത്തിക്കാനുള്ള രക്ഷാപ്രവര്‍ത്തനം 15-ാം ദിനവും തുടരുന്നു. ടണലിന്റെ മുകളില്‍ നിന്ന് വെര്‍ട്ടിക്കല്‍ ഷാഫ്റ്റ് നിര്‍മ്മാണം ഇന്ന് ആരംഭിക്കും. അതേസമയം, തുരങ്കമുഖത്ത് കുടുങ്ങിയ ഓഗര്‍ മെഷീനിന്റെ ബ്ലേഡ് ഇന്ന് പൂര്‍ണമായി മുറിച്ചുമാറ്റും. ഇന്നലെ രാത്രിയോടെയാണ് വെര്‍ട്ടിക്കല്‍ ഷാഫ്റ്റ് നിര്‍മ്മാണത്തിന് ആവശ്യമായ പ്ലാറ്റ്‌ഫോമിന്റെ നിര്‍മ്മാണം പൂര്‍ത്തിയായത്.
ഒരു മീറ്റര്‍ വ്യാസമുള്ള പൈപ്പ് 90 മീറ്റര്‍ ആഴത്തിലാണ് ഇറക്കേണ്ടത്. സില്‍ക്യാര തുരങ്കമുഖത്തു നിന്നുള്ള പൈപ്പ് സ്ഥാപിക്കല്‍ നടപടികള്‍ ഇന്നലെ തടസ്സപ്പെട്ടിരുന്നു. പത്താമത്തെ പൈപ്പിന്റെ അറ്റം വളഞ്ഞതിനെ തുടര്‍ന്ന് ഓഗര്‍ മെഷീന്‍ ബ്ലേഡ് പൈപ്പില്‍ തട്ടി മുറിഞ്ഞിരുന്നു. നാലു മീറ്ററിലേറെ ദൈര്‍ഘ്യമുള്ള ഈ ബ്ലേഡ് നീക്കം ചെയ്യുന്ന പ്രക്രിയ ഇന്ന് പൂര്‍ത്തിയാകുമെന്നാണ് രക്ഷാദൗത്യസംഘം അറിയിക്കുന്നത്.
ഇതേ മാര്‍ഗത്തിലുള്ള രക്ഷാദൗത്യവുമായി മുന്നോട്ടുപോകാന്‍ കഴിയില്ലെന്ന് ദൗത്യസംഘം വിലയിരുത്തിയിട്ടുണ്ട്. മാനുവല്‍ ഡ്രില്ലിങ് ഈ മേഖലയില്‍ നടക്കുമെങ്കിലും തുരങ്കത്തിനു മുകളില്‍ നിന്നുള്ള വെര്‍ട്ടിക്കല്‍ ഡ്രില്ലിങ്ങില്‍ ആണ് ദൗത്യസംഘം ഇപ്പോള്‍ ശ്രദ്ധ നല്‍കുന്നത്. ടി.എച്ച്.ഡി.സി.എല്‍ ബാര്‍കോട്ട് അറ്റത്തുനിന്ന് ഒരു റെസ്‌ക്യൂ ടണലിന്റെ നിര്‍മ്മാണം ആരംഭിച്ചിട്ടുണ്ട്. കാഠിന്യമേറിയ പാറകള്‍ തകര്‍ക്കുന്നതിനായി നാലു നിയന്ത്രിത സ്‌ഫോടനങ്ങളും ഇവിടെ നടന്നു.
നാളെ മൈക്രോല്‍ നിര്‍മ്മാണത്തിന് ആവശ്യമായ യന്ത്രസാമഗ്രികള്‍ സ്ഥാപിക്കുന്നതും പൂര്‍ത്തിയാകും. തുരങ്കത്തില്‍ അകപ്പെട്ട തൊഴിലാളികള്‍ക്ക് കുടുംബാംഗങ്ങളുമായി സംസാരിക്കുന്നതിന് ബി.എസ്.എന്‍.എല്‍ ലാന്‍ഡ് ലൈന്‍ കണക്ഷന്‍ തുരങ്കത്തില്‍ നല്‍കിയിട്ടുണ്ട്. ഇന്നലെ രാത്രി രക്ഷാദൗത്യത്തില്‍ പങ്കെടുക്കുന്ന സംഘങ്ങളുടെ തലവന്മാരുമായി ഉന്നതലയോഗം ചേര്‍ന്ന ഉത്തരാഖണ്ഡ് മുഖ്യമന്ത്രി പുഷ്‌കര്‍ സിങ് ധാമി സ്ഥിതിഗതികള്‍ വിലയിരുത്തിയിരുന്നു.
