മസ്ഗോൺ ഡോക്ക് ഷിപ്പ് ബിൽഡേഴ്സ് ലിമിറ്റഡും കൊച്ചി ആസ്ഥാനമായ നവാൾട്ടും ചേർന്ന് വികസിപ്പിച്ച ഇന്ത്യയിലെ ഏറ്റവും വേഗമേറിയ സൗരോർജ്ജ ബോട്ട് നീറ്റിലിറക്കി. ‘ബരാക്കുഡ’ എന്ന പേരിൽ പുറത്തിറക്കിയിരിക്കുന്ന ബോട്ട് പരിസ്ഥിതി സൗഹൃദ സമുദ്രഗതാഗതത്തിൽ പുതിയ ചുവടുവെപ്പാണ്.
ഒറ്റ ചാർജിൽ ഏഴുമണിക്കൂർ റേഞ്ച് നൽകുന്ന ബോട്ട് 12 നോട്ടിക്കൽ മൈൽ ഉയർന്ന വേഗവും നൽകുന്നുണ്ട്. 12 പേർക്ക് യാത്ര ചെയ്യാവുന്ന ബോട്ടിന് 14 മീറ്റർ നീളവും 4.4 മീറ്റർ വീതിയും ആണ് ഉള്ളത്. ശബ്ദം, കുലുക്കം, മലിനീകരണം എന്നിവയില്ലാതെ സഞ്ചരിക്കാവുന്ന ബോട്ടിൽ ഇരട്ട 50 കിലോ വാട്ട് ഇലക്ട്രിക് മോട്ടോറുകൾ, ഒരു മറൈൻ ഗ്രേഡ് എൽ എഫ് പി ബാറ്ററി, ആറു കിലോ വാട്ട് സോളാർ പവർ എന്നിവയും ഉൾപ്പെടുന്നു.
കടലിൽ ചാട്ടുളി പോലെ പായുന്ന മത്സ്യമായ ബരക്കുഡയുടെ(ശീലാവ് ) പേരാണ് ബോട്ടിന് നൽകിയിരിക്കുന്നത്. സൗരോർജ്ജ ബോട്ടുകളുടെ സാങ്കേതിക വിദ്യക്കും രൂപകൽപ്പനയ്ക്കും കാർബൺ വിമുക്ത സമുദ്രഗതാഗതത്തിനുമുള്ള അന്താരാഷ്ട്ര അംഗീകാരങ്ങൾ നേടിയ നവാൾട്ട് നിർമ്മാണ പങ്കാളിയായ ബോട്ടിന് നാല് മീറ്റർ ഉയരമുള്ള തിരമാലകളിലൂടെ വരെ സഞ്ചരിക്കാനാകും.